Huawei kompaniýasynyň ýolbaşçylary bilen sanly bilim boýunça hyzmatdaşlygyň ileri tutulýan ugurlary ara alnyp maslahatlaşyldy
Huawei kompaniýasy tarapyndan guralan “Amplify Intelligence” atly halkara forumyň çäklerinde Türkmenistanyň Bilim ministriniň orunbasary Azat Ataýewiň Huawei kompaniýasynyň wise-prezidenti Lýu Guýi bilen duşuşygy boldy. Duşuşykda bilim tehnologiýalary hem-de Türkmenistanda bilim ulgamyna sanly çözgütleri ornaşdyrmak boýunça hyzmatdaşlygy berkitmegiň meseleleri ara alnyp maslahatlaşyldy. Mundan başga-da, taraplar Türkmenistanyň bilim ulgamyna okuw işlerini dolandyrmagyň netijeliligini ýokarlandyrmaga, talyplaryň ýetişigine gözegçilik etmäge we mugallymlaryň hünär derejesini kämilleşdirmäge mümkinçilik berýän Huawei sanly platformalaryny sazlaşykly ornaşdyrmagyň wezipelerini ara alyp maslahatlaşdylar. Ministriň orunbasary Huawei kompaniýasynyň ýolbaşçylaryny Türkmenistanyň hormatly Prezidenti Serdar Berdimuhamedowyň ýolbaşçylygynda ykdysadyýetiň ähli pudaklaryna we jemgyýetiň ähli taraplaryna sanly tehnologiýalary ornaşdyrmak boýunça alnyp barylýan işler bilen tanyşdyrdy. Ol, hususan-da, ýurtda bilim babatda maglumat-aragatnaşyk tehnologiýalarynyň ösdürilişi we bilim ulgamyna ornaşdyrylýan innowasion sanly çözgütler barada maglumat berdi. Bilim ministriniň orunbasary “Huawei Connect – 2024” atly sergide görkezilen bilim ulgamynda emeli aňy ahlak (etiki) taýdan ulanmagyň innowasion çözgütlerine hem-de forumda teklip edilen bilim babatda maglumat-aragatnaşyk tehnologiýalary boýunça hyzmatdaşlygyň giň mümkinçiliklerini açýan Huawei ICT academy taslamasyna gyzyklanma bildirilýändigini aýtdy.
Lýu Guý bilim ulgamyny sanlylaşdyrmagyň wajyplygyny belläp, hyzmatdaşlygyň okatmagy emeli aňyň, bulut tehnologiýalaryň we uly göwrümli maglumatlaryň esasynda dolandyrmagyň ulgamlaryny ulanmak ýaly esasy ugurlaryny aýratyn nygtady. Şeýle hem, Huawei ICT academy taslamasynyň çäklerinde talyplara we mugallymlara halkara sertifikatlaryny almaga mümkinçilik berýän hyzmatdaşlygy mundan beýläk-de ösdürmegiň meseleleri ara alnyp maslahatlaşyldy.
Lýu Guý özleriniň tehnologik çözgütlerini teklip etmek bilen bilelikdäki taslamalary amala aşyrmaga taýýardyklaryny nygtady.
Türkmenistanyň Bilim ministrligi