Ýurdumyzyň sport ösüşleriniň dabaralanmasy

Häzirki zaman sportunyň ylmy binýady we sport diplomatiýasy

Arkadagly Gahryman Serdarymyzyň parasatly baştutanlygynda Berkarar döwletiň täze eýýamynyň Galkynyşy döwründe ýurdumyz diňe bir ykdysady we medeni ösüşleriň däl, eýsem, dünýä ylmynyň, bedenterbiýäniň we sport diplomatiýasynyň kuwwatly iri merkezine öwrüldi. Häzirki wagtda döwlet syýasatynyň ileri tutulýan ugurlarynyň biri hem jemgyýetimizde sagdyn durmuş ýörelgelerini berjaý etmek, bedenterbiýäni we sporty ylmyň soňky öňdebaryjy gazananlary, sanly tehnologiýalar bilen sazlaşykly utgaşdyrmak, şeýle hem dünýä ýurtlary bilen hyzmatdaşlygyň täze, giň köprülerini gurmakdan ybaratdyr.

Ýakynda ýurdumyzda giňden bellenilip geçilen Türkmenistanyň Saglygy goraýyş we derman senagaty işgärleriniň güni mynasybetli guralan «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara ylmy maslahat we sergi bu ugurda amala aşyrylýan giň göwrümli işleriň aýdyň subutnamasy boldy.

Halkara forumyň taryhy ähmiýeti we sport ulgamynda ylmy bölümleri

Bu iri möçberli halkara forumy bedenterbiýe we sport ulgamynyň ylmy binýadyny düýpli kämilleşdirmekde, öňdebaryjy dünýä tejribesini ýerli tejribe bilen baýlaşdyrmakda hem-de sebitara we halkara hyzmatdaşlygy ýokary basgançaklara çykarmakda aýratyn taryhy ähmiýete eýedir. Maslahatyň çäklerinde bedenterbiýe we sport ulgamynda ýöriteleşdirilen üç sany ylmy ugurly bölümler ýokary guramaçylyk derejesinde öz işini alyp bardy. «Sport ulgamynda innowasion tehnologiýalar» we «Olimpiýa filosofiýasy we sagdyn durmuş ýörelgelerini terbiýelemek» atly bölümler Türkmen döwlet bedenterbiýe we sport institutynda öz işini üstünlikli tamamlady. «Nobatdaky Olimpiýa oýunlaryna milli ýygyndy toparlaryny taýýarlamagyň ugurlary» atly bölüm bolsa Türkmenistanyň Ýaş olimpiýaçylary taýýarlaýyş mekdebinde giňden ara alnyp maslahatlaşyldy.

Giň geografiýa we halkara gatnaşyklar

Bu abraýly ylmy maslahatyň işine diňe bir ýurdumyzyň däl, eýsem daşary ýurtlaryň hem iň öňdebaryjy sport ylymlary boýunça tanymal alymlary, professorlary, bilermenler we görnükli tälimçiler işjeň gatnaşdylar. Olaryň hatarynda Russiýa Federasiýasyndan, Hytaý Halk Respublikasyndan, Gruziýadan, Litwadan, Türkiýe Respublikasyndan, Eýran Yslam Respublikasyndan, Gazagystandan, Özbegistandan, Täjigistandan hem-de Azerbaýjandan gelen myhmanlar bar.

Şeýle hem Halkara sport tehnologiýalary birleşiginiň we Türkiýe Respublikasynyň Sport ylymlary birleşiginiň ýokary derejeli wekilleriniň bu foruma işjeň gatnaşmagy sport ulgamynda köptaraply diplomatik, ylmy we amaly gatnaşyklary has-da pugtalandyrmak üçin täze gözýetimleri açdy.

Sergi meýdançalary we amaly-görkezme sapaklary

Maslahat diňe bir nazary çykyşlar we ylmy nutuklar bilen çäklenmän, eýsem, ýokary derejeli amaly-görkezme dersleri, giň möçberli sergiler we halkara derejeli okuw sapaklar bilen baýlaşdyryldy. Forumyň bölümçeleriniň işine başlamazdan ozal, gatnaşyjylar Türkmen döwlet bedenterbiýe we sport institutynyň sergi meýdançasynda ýurdumyzyň sport üstünliklerine bagyşlanan sergini uly gyzyklanma bilen synladylar.

Bu sergide «Olimp» ylmy-usuly merkeziniň amala aşyrýan düýpli barlag işleri, türgenleri taýýarlamakda we olaryň netijeliligini ýokarlandyrmakda giňden peýdalanylýan döwrebap innowasion tehnologiýalar hem-de sanly ulgamyň mümkinçilikleri barada anyk hem-de täsirli maglumatlar berildi.

Gelen myhmanlar we ýerli alymlar tarapyndan umumylykda 150-den gowrak çuňňur mazmunly ylmy çykyşlar diňlenildi. Bellenilişi ýaly, häzirki zaman sport üstünlikleri diňe bir türgeniň fiziki mümkinçiligine däl, eýsem sanly tehnologiýalary we sport biomehanikasyny giňden ulanmaga, sport lukmançylygynyň hem-de psihologiýasynyň iň täze gazananlaryna, ylmy barlaglaryň netijelerine daýanýan amaly usullara göni baglydyr.

Şeýle hem maslahatyň çäklerinde halkara sport federasiýalaryň tejribeli hünärmenleriniň gatnaşmagynda sportuň boks, erkin göreş, adaty karate, uşu, badminton hem-de stol tennis görnüşleri boýunça ýörite ussatlyk görkezme çykyşlary guraldy. Bu amaly sapaklar ýaş türgenlerimiz we tälimçilerimiz üçin uly tejribe mekdebi boldy.

Hyzmatdaşlygyň täze tapgyrlary we geljekki wezipeler

Forumyň çäklerinde Türkmen döwlet bedenterbiýe we sport institutynyň Gruziýanyň döwlet sport uniwersiteti bilen özara bähbitli hyzmatdaşlyk gatnaşyklaryny ýola goýmak hem-de Bedenterbiýe we sport uniwersitetleriniň halkara birleşiginiň çäklerinde hyzmatdaşlygy berkitmek baradaky meseleleriň ara alnyp maslahatlaşylmagy milli sport ylmynyň dünýä giňişligine ýakynlaşmagynda möhüm ädim boldy.

Ylym bilen amaly tejribäni berk birleşdiren bu giň göwrümli maslahatyň jeminde sport ulgamyny ösdürmek barada birnäçe wajyp teklipler we çözgütler öňe sürüldi. Dünýäniň öňdebaryjy sport merkezleriniň we birleşikleriniň ylmy işläp taýýarlamalaryny milli türgenleri taýýarlamakda giňden peýdalanmak, sport lukmançylygyny kämilleşdirmek, dikeldiş usullaryny hem-de türgenleriň iýmitleniş ulgamyny halkara standartlara laýyk getirmek, ýaşlaryň arasynda köpçülikleýin bedenterbiýäni, sagdyn durmuş ýörelgelerini hem-de Olimpiýa filosofiýasyny işjeň wagyz etmek esasy ugurlaryň hatarynda kesgitlenildi.

Sport diňe bir ýaryş we bäsleşik däl, eýsem, halklary birleşdirýän, parahatçylygy, dostlugy hem-de ynsanperwerlik ýörelgelerini dabaralandyrýan beýik güýçdür. Halkara ylmy maslahatda gazanylan netijeler we beýan edilen gymmatly pikirler ýörite taýýarlanylan ylmy ýygyndyda öz giň beýanyny tapdy. Maslahata gatnaşanlar ylym-bilimi we sporty ösdürmäge ähli şertleri döredip berýän giň mümkinçilikleri, halkara hyzmatdaşlygyna berilýän ýokary goldawy üçin Hormatly Prezidentimize, Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza tüýs ýürekden çuňňur hoşallyklaryny beýan etdiler.

Türkmen döwlet bedenterbiýe we

sport institutynyň Ylym bölümi.