Türkmenistan – Somali Federatiw Respublikasy: bilim ulgamy hyzmatdaşlygyň möhüm ugry diýlip kesgitlenildi
28-nji awgustda Türkmenistanyň Bilim ministri J.Gurbangeldiýew bilen Somali Federatiw Respublikasynyň Türkmenistandaky täze bellenen Adatdan daşary we Doly ygtyýarly Ilçisi Fathudin Ali Mohamediň ýolbaşçylygyndaky wekiliýetiň arasynda duşuşyk geçirildi.
Bilim ministri hormatly myhmany Somali Federatiw Respublikasynyň Türkmenistandaky ilkinji täze Adatdan daşary we Doly ygtyýarly Ilçisi wezipä bellenmegi bilen mähirli gutlap, iki ýurduň arasynda gatnaşyklaryň ösdürilmegi ugrunda alyp barjak işlerinde üstünlikleri arzuw etdi.
Duşuşykda iki döwletiň arasynda bilim ulgamynda ikitaraplaýyn hyzmatdaşlygy ýola goýmak maksadyndan ugur alnyp, birnäçe teklipler ara alnyp maslahatlaşyldy.
Türkmenistanyň Prezidenti Hormatly Serdar Berdimuhamedowyň daşary syýasy strategiýasynyň çäklerinde, biziň ýurdumyzda dünýä döwletleri, abraýly halkara guramalary bilen syýasatda, ykdysadyýetde, medeniýetde, hususanda ynsanperwer gatnaşyklaryň pugtalandyrylmagyna ýardam edýän bilim ulgamynyň ösdürilmegine aýratyn üns berilýändigi nygtaldy.
Ministr öz gezeginde Türkmenistanyň bilim ulgamynyň gurluşy, onuň hukuk binýadynyň dünýä ülňülerine laýyk ösdürilmegi üçin kabul edilen konsepsiýalar, ýurdumyzda bilimiň hilini ýokarlandyrmak üçin alnyp barylýan giň gerimli işler, halkara hyzmatdaşlygynda gazanylýan üstünlikler, ýokary okuw mekdeplerinde bilim berilýän hünärler barada gürrüň berdi.
Şeýle hem, Türkmenistanda mekdep okuwçylarynyň we talyplaryň arasynda geçirilýän halkara derejeli bäsleşiklere, olimpiadalara Somali Federatiw Respublikasynyň ýaşlarynyň hem gatnaşmagyny teklip etdi.
Ilçä Türkmenistanyň ynsanperwer ýörelgelerden ugur alýan bilim babatdaky halkara hyzmatdaşlygy barada gürrüň berildi.
Hormatly myhman sözüni dowam edip, Somali Federatiw Respublikasynyň we Türkmenistanyň bilim edaralarynyň arasynda geljekde hyzmatdaşlygyň şertnama-hukuk binýadynyň döredilmegine, aýratyn hem bu ýurduň ýaşlarynyň Türkmenistanyň ýokary okuw mekdeplerinde birnäçe hünärler esasynda, aýratyn hem nebit-gaz, lukmançylyk, deňiz ulaglary hünärleri boýunça bilim almak mümkinçiliginiň döredilmegine isleg bildirýändigini habar berdi.
Duşuşygyň ahyrynda taraplar birek-birege üstünlikleri we ikitaraplaýyn hyzmatdaşlygy ösdürmek üçin alnyp baryljak işlerde şowlulyklary arzuw etdiler.
Şeýle-de okaň: sng.fm; VestiAbad.ru