Aşgabatda mekdep okuwçylarynyň arasynda geçirilen "Merdana nesil – 2025" bäsleşiginiň ýeňijileri yglan edildi
"Watan" kinokonsert merkezinde Türkmenistanyň umumybilim berýän mekdepleriniň 3 – 5-nji synp oglanlarynyň arasynda geçirilen "Merdana nesil – 2025" bäsleşiginiň ýeňijilerini yglan etmek dabarasy boldy. Halkara Bitaraplyk gününe bagyşlanan bäsleşik Türkmenistanyň Magtymguly adyndaky Ýaşlar guramasynyň Merkezi geňeşi we Bilim ministrligi tarapyndan bilelikde guraldy.
Jemleýji tapgyra welaýat we şäher tapgyrlarynda üç basgançakly bäsleşigi üstünlikli geçen mekdep okuwçylary gatnaşdylar. Jemleýji tapgyryň netijeleri boýunça, emin agzalarynyň biragyzdan gelen karary bilen baş baýrak (Gran-pri) BAE-niň Prezidenti Şeýh Zaýid bin Sultan Al-Nahaýýan adyndaky Döwletliler köşgüniň 4-nji synp okuwçysy Babajan Meretdurdyýewe berildi.
Birinji orny Yslamberdi Nyýazmämmedow (Balkan welaýaty) eýeledi. Ikinji orunlar Aly Jumamuhammedowa (Mary welaýaty) we Umyt Rzagulyýewe (Ahal welaýaty) berildi. Üçünji orna Salyh Baýramgeldiýew (Daşoguz), Jemşit Allaberdiýew (Arkadag) we Meýlisjan Töräýew (Lebap welaýaty) mynasyp boldy.