Türkmenistanyň Bilim ministrliginiň pawilýony «Kids Expo» sergi-ýarmarkasynda «Iň gowy pawilýon» hökmünde ykrar edildi

Aşgabatda geçirilen «Kids Expo: ähli zat çagalar üçin» ilkinji halkara sergi-ýarmarkasynda Türkmenistanyň Bilim ministrliginiň pawilýony «Iň gowy pawilýon» diýen ada sergä gelenleriň Türkmenistanyň Telewideniýe, radiogepleşikler we kinematografiýa baradaky döwlet komitetiniň “Mahabat” müdirliginiň onlaýn platformasynda geçirilen SMS ses berişligi netijesinde mynasyp boldy. Umuman, bu pawilýona turkmentv.gov.tm web-saýtynda görkezilişi ýaly 3223 ses berildi.

Sergi-ýarmarka Russiýa, ABŞ, Germaniýa, Türkiýe, Hytaý we beýleki ýurtlardan köp sanly içerki we daşary ýurtly gatnaşýanlary bir ýere jemledi. Dört günläp dowam eden sergide myhmanlar çagalar üçin harytlaryň we hyzmatlaryň iň täze görnüşleri bilen tanyşmaga hem-de baý medeni çykyşlardan lezzet almaga mümkinçilik aldylar.

Türkmenistanyň Bilim ministrliginiň pawilýony özüne degişli eksponatlar we çagalary okatmagyň hem-de terbiýelemegiň döwrebap usullaryny görkezmegi bilen myhmanlaryň ünsüni çekdi. Bu bolsa oňa bäsleşikde birinji orny eýelemäge mümkinçilik berdi.

Bilimler we talyp ýaşlar gününiň öňüsyrasynda serginiň geçirilmegi Türkmenistanyň medeni durmuşynda ýatdan çykmajak waka boldy.

Çärä Hökümet, diplomatik edaralarynyň we halkara guramalaryň wekilleri bilen bir hatarda ýurdumyzyň dürli künjeklerinden we daşary ýurtlardan gelen myhmanlar hem gatnaşdylar. Türkmenistanyň Prezidenti Serdar Berdimuhamedow bu ýere ýygnananlara ýaş nesliň sazlaşykly ösmeginiň ähmiýetini nygtap, serginiň ýurduň işewür durmuşynda ähmiýetli waka boljakdygyny beýan edýän gutlag sözlerini ýollady.