Ýagşygeldi Kakaýew adyndaky Halkara nebit we gaz uniwersitetinde Lu Ban ussahanasyny döretmek boýunça iş maslahaty geçirildi
Berkarar döwletiň täze eýýamynyň Galkynyşy döwründe Türkmenistanyň Prezidenti hormatly Serdar Berdimuhamedowyň taýsyz tagallalarynyň we halkara hyzmatdaşlyklarynyň netijesinde ýurdumyzyň ylym-bilim kuwwaty yzygiderli berkidilýär.
Hormatly Prezidentimiziň öňde goýan wezipelerine laýyklykda Ýagşygeldi Kakaýew adyndaky Halkara nebit we gaz uniwersiteti daşary ýurtlaryň abraýly uniwersitetleri, halkara guramalary we kompaniýalary bilen ylym-bilim ulgamynda işjeň we netijeli hyzmatdaşlygy alyp barýar.
2023-nji ýylda Hormatly Arkadagly Gahryman Prezidentimiziň Hytaý Halk Respublikasyna amala aşyran döwlet saparynda kabul edilen Türkmenistanyň we Hytaý Halk Respublikasynyň bilelikdäki beýannamasynda «Lu Ban ussahanasy» taslamasyny amala aşyrmagy ilerletmek baradaky teklip öňe sürüldi.
Şunuň bilen baglylykda, 2024-nji ýylda Hytaý Halk Respublikasynyň Sian şäherinde Ýagşygeldi Kakaýew adyndaky Halkara nebit we gaz uniwersitetiniň, Sian nebit uniwersitetiniň, Hebeý nebit hünär-tehniki uniwersitetiniň, Hytaýyň milli nebitgaz korporasiýasynyň (CNPC) hem-de Hytaýyň bilim ulgamynda halkara alyş-çalyş assosiasiýasynyň arasynda özara düşünişmek hakynda Ähtnama gol çekildi.
Ähtnamanyň esasy maksady Ýagşygeldi Kakaýew adyndaky Halkara nebit we gaz uniwersitetinde Lu Ban ussahanasyny döretmek bolup durýar.
Ähtnamada göz öňünde tutulan wezipeleri ýerine ýetirmek üçin 2025-nji ýylyň 10-11-nji martynda uniwersitetde Lu Ban ussahanasyny döretmek we durmuşa geçirmek boýunça Türkmenistanyň Bilim ministrliginiň, Hytaý Halk Respublikasynyň Kommunistik Partiýasynyň Şensi prowinsiýa komitetiniň sekretarynyň orunbasary, Hytaý Halk Respublikasynyň Türkmenistandaky ilçihanasynyň, Hytaýyň CNPC kompaniýasynyň Türkmenistandaky şahamçasynyň, Sian nebit uniwersitetiniň, Hebeý nebit hünär-tehniki uniwersitetiniň, Şensi hünär-tehniki kollejiniň wekiliýetiniň gatnaşmaklarynda Lu Ban ussahanasynyň hünärkämilleşdiriş okuwlarynyň açylyş dabarasy hem-de iş maslahaty geçirildi.
Maslahatyň çäginde Hytaý Halk Respublikasynyň wekiliýeti Ýagşygeldi Kakaýew adyndaky Halkara nebit we gaz uniwersitetiniň gurluşy, okuw binalary, ylmy-barlag we okuw merkezleri, barlaghanalary, uniwersitetde taýýarlanylýan hünärler we ugurlar hem-de alnyp barylýan ylmy-barlag işleri bilen tanyşdyryldy.
Maslahatyň dowamynda Hytaý Halk Respublikasynyň wekiliýeti bilen bilelikde Lu Ban ussahanasynyň taslamasynyň gurluşyk-gurnama işleri, barlaghana enjamlary, şeýle hem “Gazylyp alynýan peýdaly magdanlaryň geologiýasy we gözlegi” hem-de “Maglumat ulgamlary we tehnologiýalary (nebitgaz pudagynda)” bakalawr taýýarlyk ugurlary boýunça uniwersitetiň mugallymlarynyň hünär kämilleşdiriş okuwlarynyň açylyş dabarasy geçirildi we degişli şahadatnamalar gowşuryldy. Bilelikdäki okuw maksatnamasyna laýyklykda, Sian nebit uniwersitetiniň magistraturasynda okamak üçin 2025-nji ýylda Ýagşygeldi Kakaýew adyndaky Halkara nebit we gaz uniwersitetini tamamlaýan zehinli talyplary (uçurymlary) saýlap almak we kabul etmek, dünýäniň sebitlerini we aýry-aýry ýurtlaryny toplumlaýyn öwrenmek boýunça hyzmatdaşlygyň meseleleri ara alnyp maslahatlaşyldy.
Hünär kämilleşdiriş okuwlarynyň açylyş dabarasynyň hem-de iş maslahatynyň ahyrynda maslahata gatnaşyjylar daşary ýurtlaryň abraýly ugurdaş ýokary okuw mekdepleri, kompaniýalary, ylmy-barlag merkezleri bilen ylym-bilim ulgamynda hyzmatdaşlyk etmek we tejribe alyşmakda döredip berýän mümkinçilikleri üçin Arkadagly Gahryman Serdarymyza we Gahryman Arkadagymyza köp sagbolsunlaryny aýtdylar.
Ýagşygeldi Kakaýew adyndaky
Halkara nebit we gaz uniwersiteti
Şeýle hem okaň: