Türkmenistanyň Bilim ministrliginiň we Russiýa Federasiýasynyň Magaryf ministrliginiň wekilleriniň duşuşygynyň netijeleri boýunça metbugat habary
Aşgabat, 2024-nji ýylyň 30-njy oktýabry — Türkmenistanyň Bilim ministrliginde Türkmenistanyň Bilim ministrliginiň wekilleriniň Russiýa Federasiýasynyň Ylym we ýokary bilim ministriniň orunbasary Konstantin Mogilewskiý bilen duşuşygy boldy. Gepleşikler Ykdysady hyzmatdaşlyk boýunça hökümetara türkmen-rus toparynyň ýolbaşçylarynyň duşuşygyna gatnaşmak üçin gelen Russiýa delegasiýasynyň resmi saparynyň çäklerinde geçirildi. Duşuşyk ýokary bilim ugrundaky mundan beýleki hyzmatdaşlyga, tejribe alyşmaga we geljegi uly bilim taslamalaryny durmuşa geçirmäge bagyşlandy.
Duşuşykda taraplar iki ýurduň talyplary üçin täze mümkinçilikleri döretmekde möhüm ädim boljak bilelikdäki uniwersiteti döretmek baradaky başlangyç ýaly birnäçe möhüm meseleleri ara alyp maslahatlaşdylar. Bu taslama halkara standartlaryna laýyklykda hünärmenleri taýýarlamaga gönükdirilýär we ileri tutulýan ugurlarda öňdebaryjy tejribe we bilim alyşmak üçin meýdança hökmünde meýilleşdirilýär.
Türkmen tarapy Russiýanyň talyplaryny 20-24-nji noýabr aralygynda Magtymguly adyndaky Türkmen döwlet uniwersitetinde himiýa ugry boýunça geçiriljek halkara ders bäsleşiklerine gatnaşmaga çagyrdy. Çäräniň dürli ýurtlardan talyplary we mekdep okuwçylaryny çekmegine garaşylýar, bu bolsa oňa gatnaşyjylaryň arasynda medeniýetara özara gatnaşyk we bilimleri alyşmak üçin aýratyn mümkinçilik döreder.
Mundan başga-da, wekiliýetler “Prioritet 2030”, “Öňdebaryjy inženerçilik mekdepleri” we “Ylym we uniwersitetler” ýaly ýokary bilimde Russiýanyň maksatnamalaryny durmuşa geçirmekde tejribe alyşmak mümkinçiliklerini ara alyp maslahatlaşdylar. Türkmen hünärmenleriniň rus tejribesi bilen tanyşmaklary we öz milli zerurlyklaryna görä oňyn tejribeleri özleşdirmekleri üçin tanyşdyryş saparlaryny we bilim maslahatlaryny guramagyň ugurlary kesgitlendi.
Duşuşygyň ahyrynda taraplar bilim ulgamynda uzak möhletleýin we özara bähbitli hyzmatdaşlygy ösdürmäge bolan ymtylyşlaryny nygtadylar we Russiýa bilen Türkmenistanyň arasyndaky bilim gatnaşyklaryny goldamaga we ösdürmäge gönükdirilen täze başlangyçlary durmuşa geçirmäge taýýardyklaryny beýan etdiler.
Türkmenistanyň Bilim ministrligi
Şeýle hem okaň: