„Saglygy goraýyş, bilim we sport berkarar döwletiň täze eýýamynyň galkynyşy döwründe“ atly halkara ylmy maslahatynyň umumy mejlisi

2024-nji ýylyň 10-njy oktýabrynda «Sport» myhmanhanasynyň mejlisler zalynda „Saglygy goraýyş, bilim we sport Berkarar döwletiň täze eýýamynyň Galkynyşy döwründe“ atly halkara ylmy maslahatynyň umumy mejlisi geçirildi.

Ylmy maslahatyň başynda Türkmenistanyň Ministrler Kabinetiniň Başlygynyň orunbasary B.Orazdurdyýewa çuňňur hormatlanylýan Türkmenistanyň Prezidentiniň «Saglygy goraýyş, bilim we sport Berkarar döwletiň täze eýýamynyň Galkynyşy döwründe« atly halkara ylmy maslahatyň öz işine başlamagy mynasybetli halkara ylmy maslahata gatnaşyjylara iberen Gutlagyny okady.

Halkara ylmy maslahatynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy Derýageldi Orazow, Germaniýa Federatiw Respublikasyndan Kardiohirurg lukmany, lukmançylyk ylymlarynyň doktory, professor Ýohann Engelbert Maýsner, «Prof.Dr.Dhom & Kollegen» hususy klinikasynyň diş lukmany, lukmançylyk ylymlarynyň doktory, professor Günter Ýakob Dom, Mýunhen şäherindäki Lýudwig Maksimilian uniwersitet klinikasynyň Ortopediýa fizioterapiýa we reabilitasiýa departamentiniň hirurg-ortoped lukmany, lukmançylyk ylymlarynyň doktory, professor Folkmar Ýansson maslahata gatnaşyjylary Türkmenistanyň Saglygy goraýyş we derman senagaty işgärleriniň güni bilen mähirli gutladylar we fizioterapiýa we reabilitasiýa barada, şeýle hem Berlin şäherindäki Şarite uniwersitet klinikasynyň Fiziologiýa institutynyň Kosmos lukmançylygy we ekstremal şertleriň merkeziniň ýolbaşçysy, lukmançylyk ylymlarynyň doktory, professor Hanns - Kristian Gung “Türkmenistanda saglygy goraýyşy ösdürmekde Fiziologiýa ylymlary pudagyndaky halkara hyzmatdaşlygynyň ähmiýeti” barada, Türkiýe Respublikasyndan Koç uniwersitet hassahanasynyň çaga kardiologiýasy bölüminiň müdiri, lukmançylyk ylymlarynyň doktory, professor Ender Ödemiş «Dogabitdi ýürek kemçiliklerini bejermegiň endowaskulýar usullary» atly tema boýunça, Russiýa Federasiýasyndan Astrahan Döwlet lukmançylyk uniwersitetiniň dosenti, biologiýa ylymlarynyň kandidaty Natalýa Salnikowa “Hazarýaka pesliginde ösýän Scutellaria Hastifolia ösümliginiň fitohimiki gözlegi” atly tema boýunça, Naberežnyýe Çelny döwlet mugallymçylyk uniwersitetiniň rektory, ykdysadyýet ylymlarynyň kandidaty Alfinur Azatowna Galiakberowa “Pedagoglary taýýarlamakda innowasion tehnologiýalar: Naberežnyýe Çelny döwlet mugallymçylyk uniwersitetiniň tejribesi” atly tema boýunça, we Amerikanyň Birleşen Ştatlaryndan Kent döwlet uniwersitetiniň wise-prezidenti, professor Marçello Fantona “XXI asyrda bilimiň esasy hökmünde medeni gatnaşyklaryň möhüm ähmiýeti” babatda çykyş etdiler. 

Maslahatyň dowamynda «Saglygy goraýyş, bilim we sport Berkarar döwletiň täze eýýamynyň Galkynyşy döwründe« atly halkara sergisine gatnaşan öňdebaryjy kompaniýalaryna diplomlary gowşuryş dabarasy boldy.

Ylmy maslahatyň ahyrynda «Saglygy goraýyş, bilim we sport Berkarar döwletiň täze eýýamynyň Galkynyşy döwründe« atly halkara ylmy maslahatyna gatnaşyjylaryň adyndan çuňňur hormatlanylýan Türkmenistanyň Prezidentine ýüzlenme kabul edildi. 

Gahryman Arkadagymyzyň, Arkadagly Gahryman Serdarymyzyň saglygy goraýyş ulgamynyň kämilleşdirilmegine, lukmançylyk ylmynyň ösdürilmegine we ylmy-lukmançylyk diplomatiýasynyň dünýäde dabaralandyrylmagyna gönükdirilen döwlet syýasatynyň, bu ugurda halkara hyzmatdaşlygy pugtalandyrmak babatynda uly goldawa eýe bolýan beýik başlangyçlarynyň elmydama rowaç bolmagyny arzuw edýäris!

Bu ylmy maslahat häzirki zaman saglygy goraýyş ulgamynyň gazananlary babatda pikir we tejribe alşylmagyň özara täzeçil ugurlaryna, dünýä lukmançylygynda ylmy dolanşyga giriziljek innowasion garaýyşlaryň, gazanyljak ylalaşyklaryňdyr kabul ediljek kararlaryň dabaralanmagyna, döwletimiziň ösüşiniň täze tapgyrynda – Berkarar döwletiň täze eýýamynyň Galkynyşy döwründe saglygy goraýyş ulgamynyň, türkmen lukmançylyk ylmynyň, lukmançylyk diplomatiýanyň ösüşleriniň dünýäde dabaralandyrylmagyna giň mümkinçilikleri döreder.